قصة ليندة و حمزة

بدات حكاية ليندا كي جابت BEM تاعها  باباها حب يكافأها و ديسيدا يديهم يحوسوا فالبحر 
و هاذ المرة يطولو قاللهم يجوزوا شهر قاع فلابلاج و فالتحواس 
ليندا شابة وزادت دات حوايج فور للتحويسة *,* قطعت شعرها و مع هو ذهبي شوية ديسيدات تولي تبوكليه باش ما يتخسرلهاش مع الماء تاع لبحر 
ناضوا بكري ولبسوا و قلعوا للبحر وين راح يكومبيو عجبتهم بزاف لبلاصة عرفوا بلي صح راح يعجبهم الحال و يزيدوا يريحوا 

جاز النهار الاول في استكشاف المكان 
يمشوا على الشط و منين داك يشبكوا ليندا ما حبتش تشمخ روحها بالماء .......
مي خوها خالد الصغير طوايشي راح ارماها فالماء و هي مادامها شمخت بدات تعوم تقول حوتة تدخل و تخرج بين الموجات لخفاف و تبطا تحت الماء وكي خرجت ما نحكيلكومش تقول ممثلة *_* راهي تورني في فيلم هي طلعت راسها لقات واحد مقابلها شباااااااااااااااااب مسرار حلو كور وديكور ☺ يخزر فيها باندهاش وهي من الحشمة تبسمت حطت راسها ♥ 
و جرات باش تلحق باباها و خوها

جاز النهار الاول رقدوا بكري فالدار اللي كراوها علاخاطر عياو بصح ناضو بكري بزاف قالوا لباباهم مانولوش نرقدوا بكري ماشي آفار قاللهم اوكي فالنهار لبحر و فالليل نروحوا نسهروا *-* وين يديروا الحفلات ليندا سوطات من الفرحة و باست باباها و عنقاتوا حنينة و عويقلة مسكينة ☺ ماكانش علابالها واش يستنى فيها 
.
.
راحو للبحر يعوموا حتى سطالا قدامهم قروب تاع ليجان بداو يديروا الهول الضحك الدربوكة القيتارة غناهم فور 
غناو أغنية en anglais ليندا عجبها الصوت حبت تشوف اللي غناها 
ايما هذاك الشباب رفد راسو لقى الشويبة تاع ليندة تخزر فيه ضحك معاها و قاللها 
هو: متشرف بيك مدموزال ^^
هي: صوتك بزاف شباب الله يبارك 
هو : وانتي بزاف شابة الله يبارك
ليندا ماتت من الفرحة قالتلو انا ليندة عندي 15سنة جبت البيام جابوني لهنا ☺
هو: انا حمزة عندي 18سنة جبت الباك هاد العام ديسيديت نحوس انا و دارنا و على حساب الشوفة درت آفار مليحة كي جيت 
هنا ليندة و حمزة بداو يتحابو و يتقربوا من بعضاهم و اعطاو لبعضاهم التيليفون وولا يعيطلها كل ما يشوفها مريحة و كي تعوم يقرب وين تكون و يجيب السبة بختو الصغيرة ☺ اللي هي تان تعرفت بخالد ولاو يلعبو كيف كيف .....

وليندة الستوتة كانت جيب سبة وتدي خوها خالد باش يشريو و هوما يتلاقاو و يريحوا وحدهم حمزة حب بزاف ليندة و سورتوا باينة جامي عرفت في حياتها هو الاول و ليندا طاحت في حمزة و لقات فيه الحنانة و الطيبة و الرجلة 
و في السهرات كان يرفد القيتارة و يغنيلها الغنيات اللي تحبهم و الناس قاع دايرين بيه و يسفقولوا مخلوعين فيه لبنات قاع طايحات فيه و هو عينيه غير فليندة يكمل الاغنية يروح ليها و يسقسيها عجباتك تقول كاين غير هي ف la piste المهم كبر الحب ما بيناتهم و جازوا اليامات و 
زادت العشرة و قريب الفراق

حمزة ماعادش يقدر يصبر عليها بقاو يومين ليندة تروح ليندة غير تبكي فالتيليفون ماراحش تشوفوا جا النهار لخر جوزوا نهار هبلي فالبحر و فالليل داها بعيد حضنها و بكاو في زوج و قاللها ما تخمي في والو عمري نلقا كيفاش نزيدو نتلاقاو ليندة طمنها بهاذ الكلمة ☺ و راحت توجد حوايجها للعودة و قلبها و عقلها و روحها عند حمزة

بدات الدخلة تاع المسيد ليندة ولات ماشي قاع هي الحب هبلها تحب حمزة و هو تانيك و حمزة دخل للجامعة يقرا الموسيقى قعدوا هكداك 3سنين بالتيليفون منين داك يتلاقاو ☺ يا حصراه تقول العيد هذاك النهار المحبة قوات وليندة جوز الباك بصح ماهيش مليحة حمزة بانتلو الفيزة يروح لانجليز باش يولي محترف و باش يأكدلها بلي يحبها قاللها نجي نخطبك من باباك و الباقي مور ما تكملي قرايتك مااااااااااااااااتت من الفرحة و خبرت يماها و هي اللي قالت لبابات ليندة 
واشنوا يخطبها قيتاريست يقرى موسيقى هبلت هذي قوليلها انساااااااااااااااي فهمتي 
ليندة تشوكات تحطمت بكات حللت ماماها باش تقنعوا والوا 
والخبر صدم حمزة و كي انسيستا باش يعرف السبة زاد حقر روحوا كي خير الدومان اللي هو يحبو خسر حبيبتوا علاش يا دنيا علاش 
هذاك الشهر جوزاتو ليندة قاع وهي غالقة على روحها فالشمبرة غير تقرا هذا جابت الباك ب 14 بصح ماشي قاع فرحانة هذا واش حبيت بابا ما تخافش الباك ديتو و نقرا في المعاهد العليا بصح اعرف بلي حياتي قتلتهالي وانا صغيرة هذ الهدرة تقولها ديما بينها و بين روحها علاخاطر حمزة قلع و سافر و لا خبر لا خبرية .....

المهم عام يجيب عام و ليندة خشخاشة ديما ماجور دو برومو غير القراية تقول ستاتو ما تضحك ما تحوس تبدل على روحها 
حتى وحد النهار جاهم تيليفون للدار 
يماها: الو نعم شكون معايا 
الوا معاك الحماية المدنية راجلك دار اكسيدون وراهو في حالة خطيرة 
ايما مسكينة هبلت دات ولادها ولحقوا بيه فالسبيطار شافوه دايم الله في خلقوا باباها مات وهو يقوللها شرفتيني بنتي في حياتي كي قريتي و نجحتي زيدي شرفيني كي نغمض عيني 
.
ليندة حلفت انها تكون خير خلف لباباها حمد الله دارتلو واش حب ♥ حمد الله شافت الفرحة في وجهوا كي كانت تقرا و تجيب مليح الحمد الله فضلت سعادة باباها على سعادتها الحمد الله خيرت برونش مليحة اللي تنجح فيها عرفت بلي صح باباها حوسلها على صلاحها برك 
علاخاطر كملت قرايتها من لقات خدمة منا في اكبر السفارات 

المهم وين كانت تخدم كانت تدور غير مع الكبار بفضل ربي و بفضل تضحيات باباها ☺
وحد النهار قرروا يديرولهم حفلة للناجحين كانت ليندة الزين شابة مي ماتحبش تتهلا في روحها بزاف 
وكي جات الحفلة ديسيدات انها تفرح و تزهى مازالها صغيرة لبست ماكييات كانت تهبل اللي يشوفها يحل فموا قاع *,* حبو يقربوا منها
.
كانت قاعدة و تسمع في صوت يغني فالحفلة ماكانش منها هذا صوتوا ما حبتش دور تخزر خافت يكون ماشي هو دارت والدموع يطيحوا خزرت لقات حمزة شاد القيتارة كي عوايدوا و يغنيلها الغنية اللي سمعتها من عندو المرة الاولى سفقولوا قاع الناس لبنات داخوا من زينوا هو اعطى القيتارة لصاحبو و راح عند ليندة 
حمزة slt مازالكي حنونة كيما نهار شفتك ☺
ليندة غير تبكي واش جابك يرحم باباك و في قلبها تقول كي ديسيديت باش ننساك
حمزة انا تان هاذ الحفلة راني معروض ليها كضيف شرف ^^ وليت رجل اعمال الهدرة تاع باباك فطنتني لحياتي و عرفت باللي لازم نقرا حاجة اللي تعطيني قيمتي قدام الناس والفن عمروا ماكان عيب مي مانخليهش يدي مني حبيبتي هي غالية عليه 

حمزة قاللها كنت نتبع في خبارك من عند خوك خالد☺ بالتخبية عليك انتيا و عرفت واش صرالكم وما قدرتش نجي للجزاير فهذيك الفترة اسمحيلي مي عمري ما نسيتك و لا بدلتك و لا حبيت غيرك و كيما نويتك حلالي بكري اذا تسمحلنا يماك نعاود نجي ماشي بحمزة الفنان حمزة رجل الاعمال 
المهم جا حمزة و دار اللي عليه و قبلوا بيه بكل فرح و سرور جوزوا يامات صعاب مي ربي مافيه غير الخير ليهم في زوج
فالاخر الصابر ينال و مول النية ديمة يربح ♥
.
                                       في الاخير رأيكم في القصة